اتوبيسك يا وطن

ولآول مرة ومنذ عهد بعيد اتنيل على عينى واركب اتوبيس كان امبارح اللى حصل ياعمى ان امبارح كان عندى مشوار فى ميدان التخليل اقصد التحرير وانت لو مش من القاهرة احب اقولك ان ده من ازحم الميادين على الاطلاق المهم قولت اخد الميكروباص وقفت فوق الساعه مفيش ميكروباص قولت مفيش حل غير المترو - مترو الانفاق ودة طبعا غير مطار الانفاق مطار الهوا بتاع مولدى تتحدى الملل - نزلت لاقيته متعطل والناس بتضرب فى بعضها قولت بقا مبدهاش نرجع لايام التهور والطيش وناخد اتوبيس ويارتنى ما جتلى الفكرة المهببه دى زحمة وقرف ونيله بس والله اكتشفت امبارح خلال ساعه ونص داخل جوه صفيحة السردين اللى بيقولوا عليها الاتوبيس اكتر من اكتشاف تعالو احكلكو

ركبت امبارح الاتوبيس بنفس الاسلوب اللى واضح فى الصورة وهو اسلوب مشهور اوى عند المصرين اطلق عليه علماء النفس والاجتماع اسلوب البرم فى المواصلات وهو اسلوب ذكى استوحاه المصرين من الدوده وهى طريقه سهله واحب اشرحها للى ميعرفها حط دماغك بين الناس وزق بجسمك بكل قوتك ورفص بأيدك ورجليك فى كل اتجاه بطريقة البرم دى هتلاقى نفس جوه الاتوبيس المهم بعد ما الاتوبس طلع بدئت اكتشف حجات كتيرة زى ما قولت


اولها : ان الانسان فعلا اصله قرد :

فبل ما حد يتهمنى بالكفر والالحاد اشرحلكوا كلامى انا شوفت ناس بتتشعلق على الماسورة اللى فى نص الاتوبيس دى ولا القرود لدرجة ان شوفت واحد متشعلق بأيدة الشمال وماسك شويه شنط بأيدة اليمين وماسك مراته وعيالة الخامسه برجلية الاتنين وبيتحرك بيهم بكل سلاسه فى الاتوبيس عن طريق الشعبطه يبقا الانسان اصله قرد ولا لاء طيب مش مصدقنى ابقى بص على الكمسرى اه الكمسرى تلاقيبه بيؤكد موضوع القرد ده هتلاقيه متشعلق على ماسورة الاتوبيس وعمال تذاكر يا كابتن ورق يا حاجه العربية فاضية ادام يا بشوات _ تقولش مركب معاه لوءات شرطة _ وسعات بيقلب لبرص اه مستغربش برص من اللى حضرتكم بتضربوه بالشبشب ولامؤخذه ودة فى اوقات الزحام القصوي تلاقيه بيلزق على السقف وعمال بقا تذاكر ورق حاسب اوى ورا على الباب يا اشرف - هو ليه كل سولقين هيئة النقل العام فى القاهرة اسمهم اشرف


ثانيها : مش كل من لبست محزق وملزق تبقا من الزمالك وجردن ستى :

بعد يا سيدى ما شوفت الراجل القرد وابتسمت لاقيت عيل غبى اوى باين كان عنده فكرة عن نظرية البرم فى المواصلات وهو يا عين امه بيطبقها وبحظفرها واثناء الترفيص بأيدة ورجله راحت ايدة جية فى مزة جااااامدة لابسالى محزق وملزق ونظارة جيبها من سوق الثلاثاء ولطعالى هاند فرى ودنها ووشمالى تاتوه فى انحاء متفرقه من تضاريس جسمها واذ يا خويا بقدرة قادرة المزة اللى تقول من الجامعه الامريكة تقلب وليه شلق من زنهم او بولاق وامتعتنا وامتعه كل الركاب بقصيدة من الردح بدئة بقولها العظيم :-

مش تفتح ....... امك ( طبعا انتت عارف هى قالت ايه بالظبط )

الواد عمل محترم وقالها اسف يا انسه

وهبا ولا كأن كلمة انسه دى شتيمة لاقتها اديته من المنقى يا خيار

وقالت :

انسه مين ياض يا ابن ينت ..............

ياللى ابوك...............................

ياللى امك................................

والكتير الكتير جدا من يالى

وختمت قصديتها بصوتغررررريب اللى يسمعه مش هيصدق انه يخرج من منخير تلك المزة الجامدة اللى لطعالى تاتوه على صدرها ولا مؤخذه

( مع اعتزارى لاصحاب حملة انا مش مزة )

بس كنت عايز اسألهم لما انتى مش مزة تبقى ايه ؟؟ حرمه ؟؟

المهم قولت ياواد طنش خالص وانت مالك لانى عارف المثل بتاع ما ينوب المسلك الا تقليب جيوبه

ثالث حاجة عرفتها : اياك تعمل جدع ابدا مهما حصل :

طبعا انا لما استخدمت اسلوب البرم فى الموصلات رشقت جنب كرسى وقولت الزق فيه منعا من ان حد يلطش فيا وهو بيطبق النظرية بس يا خويا اذ فجعتا اللى قاعد على الكرسى اللى قدامى اتجنن وقال ينزل انا بقا عملت فيها زى الاخ اللى فى الصورة دى مردتش اقعد لانى وانا بضرب بعينى لاقيت واحدة عجوزة وهى شبه اللى فى الصورة دى قولت هى اولى بالقعاد منى

ندهتلها بست بست يا حاجه يا حاجه تعالى اقعدى بمجرد ما اتحركت الست علشان تنفذ نظرية البرم وتوصلى لاقيت ولا سبعتلاف واحد بيزقنى وبضربنى وبيخبطنى علشان يلحق المكان بس اكتر بوكس انا فاكرة هو اللى خدته فى عينى اليمين من واحدة شابه صغيرة فى التمنينات من عمرها وده كان تالت درس اتعلمته فى فن ركوب الاتوبيس اياك تعمل جدع اترزع مكانك واسكت .

رابعا : بلدنا فيها عيش كتير بس انتا اللى متعرفش شبرا :

طبعا من اهم اللى عرفته ان بلدنا دى مليانه خير لدرجة ان الست اللى قعدتها مكانى لاقتها حاضنه كيس اسود بطريقه تحس انها مسكه عايل من عيالها طبعا انا وقفت وسكت ولا كأن فى حاجه بس شويه كدا وانا بضرب بعينى لعى اللى اديها لاقتها بتفتح الشنطه بعد ما اتلفتت يمين وشمال ولا كأنها بتراقب الجو لاحسن يكون فيه حراميه وبتفتح الشنطه لاقتها فيها عيش والله يا جدع انا استغربت عيش فى شنطة بيتاحفظ عليه ولا كأنه دهب المهم علشان مطولش عليك معرفش اتفتح الكلام ما بنا ازاى وعرفت منها العجب الست دى ساكنه فى حته اسمها الصف تابعه طبعا لمحافظة الجيزة سابقا حلوان حاليا _ طبعا بعد القرار الشجاع اللى هبل امنا بتاع انشاء محافظتين جداد _ هى مجرد ما قلت الصف انا صعقت بقا يا وليه يا مجنونه جايه من الصف للتحرير يعنى بتاع ثلاث ساعت موصلات علشان تجيبى عيش ردت هى وفجأتنى بالاكتر انها مش جايبه من التحرير دى جيباه من شبرا هنا فعلا ضغطى على عليا جدا بقا انتى راكبه موصلات عدت بيكى اربع محافظات علشان بجنية عيش بقا من قلت العيش فى الجيزة او حلوان او القاهرة جيه تجبيه من القليوبية ااااااااااااااااااايه يا وليه ما العيش مالى الدنيا وهنا اكتشفت اد ايه انا غبى لانى جيت على جرح جامد قوى ليها لانها اتفتحت فى العياط وحكتلى القصة :

هى ام لابنين كل واحد فيهم متجوز ومخلفله يجى ستميت عيل وكلهم مقمين فى شقه واحده مكونه من اودة واحدة ومتسألنيش ازاى - طبعا موضوع الشقه الاودة واحده هو الحل العبقرى السحري لازمة السكن اللى اتحفتنا بيه الوزارة المتعاقبه على نهب مصر اقصد حكم مصر - المهم طبعا علشان هى تأكل الناس وعلشان مفيش عيش فى البلد والمكان اللى فيه عيش اذا لاقوه مبيدهمش بأكتر من عشرة ارغفة طيب ايه الحل تفتق زهنها عن فكرة انها تقوم هى ومراتات عياله واولاد عياله من بعد صلاة الفجر ينتشرو علاى جميع افران البلد وكل واحد ياخد دوره فى طابور من الطوابير علشان يقدرو يجيبو عيش واللى حصلها امبارح وهى واقفه فى طابور عيش فى امبابه سمعت ناس بيقولوا ان فيه فرن فى شبرا بيدى بجنية بحاله فقامت النهارده بعد صلاة الفجر متوجهه لشبرا وقدرت بفضل الله وبفضل توجهات كل من السيد اللواء فلان الفلان والعقيد علان البلانى وامين الشرطه اللى مش عارف ايه بالحصول على بجنية العيش ده وطبعا ده انجاز سيسجل ليها وللعيله انها حصلت فى مثل ذالك اليوم على بجنية عيش وطبعا ده شرف لم يحصل عليه ولا واحد من ولادها ولا من منطقتها قبل كدا .......... وسلملى على الترام